«Kräuterdoktor – Kabispater». Curar cun ervas en il Grischun

Exposiziun speziala: 23.3. – 9.9.2018

Las enconuschientschas davart l'effect da las plantas medicinalas èn sa sviluppadas sur millennis en differentas culturas. Cunzunt en regiuns giu da via, sco en las Alps, nua ch'il provediment medical n'era betg garantì dapertut, han terapias cun ervas medicinalas ina lunga tradiziun. En l'exposiziun «Ervorist – giabusist» vegnan preschentadas persunalitads che han giugà ina rolla impurtanta en l'istorgia da la fitomedischina.
En il Grischun èn daventads enconuschents il «prer da las ervas» Johann Künzle (1857–1945) ed il «pader dal giabus» Thomas Häberle (1912–1997) tras lur operar sco naturopats e tras la derasaziun da lur scrittiras. Els han gì success, ma en la medischina da scola èn lur metodas per part contestadas. Oz è l'interess per la fitomedischina fitg grond. Naturopats e scienziads perscruteschan la forza curativa da las ervas medicinalas e tschertgan novas applicaziuns. En blers lieus en il Grischun vegnan cultivads ierts dad ervas, vendids products dad ervas medicinalas e purschids curs da botanica medicinala.