«Las plattinas dals Lötschers. Ils vaschlers da St. Antönien»

En il lavuratori da la famiglia Lötscher che sa chattava en il vitg muntagnard da St. Antönien, han producì durant il 19. tschientaner tschintg vaschlers durant quatter generaziuns la «cheramica dals Lötschers» che sa distingua tras in stil individual ed original. Per il Grischun è quai stà il manaschi da vaschlers il pli impurtant durant il temp modern, e quai pertutgant la qualitad, la funcziunalitad e la bellezza dals products. Ils Lötschers n'han betg mo producì vaschella da cheramica cun decoraziuns giaglias, pignas picturadas e conducts d'aua moderns, mabain els han adina er fatg ils purs ed ademplì differents uffizis publics. La vita dals vaschlers è stada marcada dal success professiunal, ma er da crisas economicas, da forzas da la natira, da tragedias da famiglia e d'emigraziun.
L'exposiziun en il museum retic, dal qual la collecziun posseda il pli grond inventari ch'è sa mantegnì, preschenta in grond dumber da questa cheramica unica e raquinta l'istorgia animada da la famiglia e da l'artisanadi dals Lötschers. Ella mussa, co ch'ils Lötschers han chattà ina nischa da producziun en il Partenz ch'era quella giada fitg isolà, ed han occupà quella cun success, fin che la construcziun da la via e da la Viafier retica han sbassà ils custs da transport per la vaschella producida industrialmain. Il vegl artisanadi è vegnì plaun a plaun sut squitsch e l'ultim vaschler, Andreas Lötscher, ha la finala stuì bandunar il manaschi da famiglia ch'era sa mantegnì durant blers onns.