Musica populara en il Grischun
La musica populara n'enconuscha nagins cunfins. Ella è adina vegnida influenzada da differents effects ed accumpogna dapi tschientaners la lavur, il mintgadi e las festas. En il militar ed a mastralias tunavan pli baud tamburs e tschivlots, entant ch'ils pasters e chatschaders utilisavan instruments carmalants e da signal. Il 19avel tschientaner sunavan las chapellas da purs d'artgists e d'instruments da flad ina maschaida variada da melodias da sautar alpinas.
Quai che nus designain ozendi sco «musica populara», è sa sviluppà il cumenzament dal 20avel tschientaner cun l'integraziun da l'orgelet da maun en las chapellas da saut professiunalas ed è l'emprim daventà popular en circuls urbans sco musica da divertiment moderna. En connex cun la Defensiun spiertala da la Patria durant la Segunda Guerra mundiala han ins declerà la musica populara sco la musica naziunala svizra. Il stil grischun da musica populara – ch'è
fitg derasà grazia a las medias – cun clarinettas, orgelets da maun da Sviz e cuntrabass, è daventà in standard, ha dentant laschà passar l'occasiun da s'adattar a las tendenzas actualas.
Evocà dal moviment da folk è vegni sveglià ils onns 1970 in nov interess per instruments, chanzuns e sauts vegls. In pau a la giada è la scena da la musica populara s'averta a modas da sunar multifaras. Oz sa preschenta ella sco tradiziunala, ma er sco innovativa, creativa ed experimentala.