«Attenziun, auto! In tschientaner sin las vias dal Grischun»
Dapi sia invenziun ils onns 1880 procura l'automobil per emoziuns intensivas – positivas sco er negativas. L'urdain da sport exclusiv da l'emprim temp è daventà a partir da l'onn 1950 il med da traffic il pli frequent. El ha pussibilità novs munds d'aventuras, ha chaschunà novas disas ed ha midà entirs abitadis e cuntradas. Da l'autra vart èsi stà necessari da far ina planisaziun dal traffic, da construir novas vias e da fixar reglas da traffic.
Il cumbat per il spazi sin las vias durant l'emprim temp da l'automobil n'è stà nagliur uschè intensiv sco en il Grischun: Suenter che la Regenza grischuna ha bandischà l'automobil da las vias il 1900, hai durà 25 onns e 9 votaziuns, fin ch'il scumond è vegnì abolì. Dapi lura n'han las discussiuns enturn l'automobil betg pers lur brisanza ed er la fascinaziun per l'auto è restada gronda.
L'exposiziun «Attenziun, auto! In tschientaner sin las vias dal Grischun» evaluescha, nua ch'il gust ed il frust per l'auto èn spezialmain gronds, tge temas e dumondas che èn adina puspè virulents e tge aspects che chaschunan emoziuns particularmain grondas. Las visitadras ed ils visitaders da l'exposiziun vegnan envidads da sa fatschentar cun ils aspects multifars da l'automobilitad dad ier e dad oz en il Grischun.