Chasa ed istorgia

Il museum retic sa chatta en ina chasa patriziana barocca cun in tetg imposant cun culmaina a crusch. La chasa è vegnida construida l'onn 1675 sco domicil privat d'in appartegnent da la classa directiva da las Trais Lias, barun Paul von Buol zu Strassberg und Rietberg (1634-1697). In toc da l'istorgia grischuna raquinta uschia gia l'edifizi cun sias stgalas ladas, cun ses arvieuts dal tschaler, cun in passagi per char e chaval, cun dus plauns d'abitar signurils sco er cun in plaun per la servitid ed in plaun sut il tetg.

La fin dal 19. tschientaner ha inizià il giurist, istoricher e politicher Peter Conradin von Planta-Zuoz (1815-1902) ina «fundaziun grischuna per scienza ed art» cun la finamira da fundar in museum. Cun in tal museum vuleva el cumbatter cunter la perdita permanenta da bains culturals dal Grischun. Ils 8 da zercladur 1872 ha il museum retic avert sia emprima exposiziun al plaunterren da la chasa Buol.

 

-