«fascinant irritant»
15 da october 2022 – 23 d'avrigl 2023
Igl è strusch enconuschent che la collecziun dal Museum retic cumpiglia plirs tschients objects etnografics da pajais lontans. Quests objects èn arrivads la fin dal 19. tschientaner ed il cumenzament dal 20. tschientaner en il museum e giaschevan fin avant pauc temp zuppads en il deposit. La collecziun exotica duess represchentar ils bains culturals mundials e contribuir a la furmaziun generala da la populaziun. Fin ussa han ins dentant mussà mo singuls objects da quella a la publicitad e las enconuschientschas respectivas sa restrenschevan sin paucas notizias mantegnidas.
La perscrutaziun actuala da las provegnientschas en ils museums ha puspè sveglià ils ultims onns l'interess per ils effectivs etnologics – er en il Museum retic. L'ester ed il nunenconuschent fascinescha, evochescha dentant er numerusas dumondas: Tgi eran las collecziunadras ed ils collecziunaders? Tge rolla giugavan els en las colonias europeicas? Sin tge via èn ils objects vegnids en lur possess e pli tard en il museum? Co tractain nus oz ils bains culturals
esters? L'exposiziun preschenta la collecziun etnografica dal Museum retic ed emprims resultats da sia analisa critica da questa collecziun. Bleras dumondas restan.