Suenter la guerra n'è nagut pli sco avant. Blers giasts aristocratics regulars dals grandhotels han pers ina part considerabla da lur facultad e restan per gronda part absents. Ils lieus turistics alpins ston sa reinventar. En il spiert dal temp sa concentreschan els sin il sport: Meran avra il 1922 ina plazza da golf da 9 foras ed organisescha turniers da tennis internaziunals. San Murezzan sa sviluppa ad in lieu da sport d'enviern internaziunal, Lech ad in center dad ir cun skis.
Bleras da las rutas da migraziun internaziunalas da la Belle Époque vegnan interruttas. A San Murezzan pussibilitescha ussa il turissem da l'entir onn da lavurar permanentamain en il medem lieu. A Lech impedescha il nov cunfin tranter l'Austria e l'Italia che forzas da lavur vegnan natiers dal sid. Er il barat tranter Meran ed ils lieus da cura da la Boemia – ch'èn ussa situads en differents pajais – resta interrut. A Meran vegnan possessurs d'hotels da la Germania e da l'Austria expropriads. Il reschim faschistic restrenscha la quota da forzas da lavur estras e promova en la nova provinza da Bulsaun, ch'ils camariers talians vegnan natiers, cun excluder las dunnas dal service.
Dentant vegnan a sa sviluppar novas furmas da migraziun en consequenza da la lavur. Fin oz resta il turissem in dals secturs economics cun la pli auta quota da forzas da lavur estras.
Placats da reclama per San Murezzan (1928), Lech (1934) e Meran (1924)
Museum retic, Cuira
Lechmuseum, Lech
Touriseum – Südtiroler Landesmuseum für Tourismus/Museo provinciale del turismo, Meran/o
Enavos a la survista >