Engadin Press
La fototeca da la chasa editura Engadin Press a Samedan cumpiglia passa 50 000 fotografias dals onns 1880 fin 1950 ed è ina da las pli grondas collecziuns da fotografias istoricas dal Grischun. Quest stgazi da maletgs è la secziun la pli nova e la pli voluminusa da la Fundaziun grischuna per la fotografia. En questa exposiziun dat ella ensemen cun il Museum retic in'emprima invista da quests munds visuals, avant che ils maletgs vegnan digitalisads e rendids accessibels a la publicitad. La chasa editura Engadin Press ha edì cartas postalas, gasettas e cudeschs. Las fotografias mussadas en l'exposiziun documenteschan persunas en lur activitads professiunalas u durant il temp liber, da cumpagnia u tar activitads sportivas. En il studio da fotografar èn vegnids producids numerus purtrets. Per prospects da reclama e per cartas postalas èn fotografias vegnidas retuschadas, concepidas sco collascha u cumbinadas cun elements grafics. L'exposiziun dat ina invista extraordinaria dals process da lavur da l'atelier da fotografar engiadinais.
Ella ans prenda cun sai sin in viadi tras il temp dal mund alpin grischun che ha subì ina midada rasanta il cumenzament dal 20avel tschientaner cun il svilup dal turissem modern. L'exposiziun sveglia dumondas, quant enavant che la fotografia documentescha u inscenescha munds da viver tradiziunals e moderns. Ed ella ans envida da daventar sezza u sez activ en l'atelier da fotografar.