Funtauna dal bainesser. Istorgia dals bogns en il Grischun
Las funtaunas eran gia baud circumdadas da mitus e lieus da praticas religiusas. En il Grischun è la pli veglia perditga da quai la tschiffada da la funtauna dal temp da bronz da San Murezzan. Il 16avel tschientaner han perscrutaders da la natira cumenzà a descriver l'effect curativ da funtaunas d'aua minerala ed ad analisar la cumposiziun da l'aua. Medis da bogn ordinavan curas extendidas da baiver e da far bogns cunter las pli differentas malsognas. Per quest intent stuevan ils emprims giasts da cura anc ascender en chavorgias e far bogn fin a 10 uras per di. Il 19avel tschientaner èn las terapias daventadas pli curtas ed i èn sa sviluppadas chasas da cura modernas che faschevan er reclama cun divertiments da temp liber.
En il decurs dal 20avel tschientaner han las funtaunas mineralas ed ils bogns da cura perdì lur significaziun da pli baud tras novas metodas da tractament cun medicaments. Percunter ha il far bogn survegnì ina rolla adina pli impurtanta per l'igiena e per la tgira dal corp. Las chasadas privatas èn vegnidas equipadas cun aua currenta e cun bogneras. I èn vegnids construids bogns publics per promover la sanadad cun far sport da nudar. Dapi intgins decennis èn las termas ed ils bogns minerals puspè populars sco destinaziuns turisticas. Purschidas da wellness e da lifestyle empermettan recreaziun per corp ed olma.