Plazza da fiera dal medieval

Dal temp medieval era il viadi dal Lai da Constanza tras la Val dal Rain, tras la citad da Cuira e sur ils pass dal Grischun la colliaziun nord-sid la pli impurtanta tranter la Germania dal Sid e la Planira dal Po en l'Italia dal Nord. Questa situaziun da traffic favuraivla ha procurà che la regiun è daventada in spazi economic, da transit e da commerzi impurtant. Las citads han furmà lias, ins aveva agricultura, mastergnanza, minieras e relaziuns commerzialas cun regiuns lunsch davent.

Dudesch posts spezialisads archeologics e museums tranter Constanza e Cuira èn sa reunids per dar – en il rom d'ina exposiziun ambulanta – invistas captivantas da la vita medievala da quest spazi economic. Var 150 chats e funtaunas scrittas da vaglia illustreschan il commerzi animà, l'artisanadi medieval ed il mintgadi en la regiun tranter las Alps e la Cascada dal Rain. Per l'emprima giada vegnan preschentads er ils chats dal quartier da mastergnants en l'areal dal Sennhof a Cuira, ch'èn vegnids scuvrids l'onn 2020.